Kalifornijske vlasti optužile su banku JP Morgan Chase za poplavu upitnih tužbi kojom banka vrši naplatu dugova po kreditnim karticama.
Državna tužiteljica Kamala Haris podijnela je vrhovnom sudu tužbu u kojoj je JP Morgan, najveća američka banka, optužena za kršenje prava potrošača prilikom naplate kartičnih dugova prema desetinama hiljada klijenata te banke u Kaliforniji.
U periodu od tri godine, od januara 2008. do aprila 2011, JP Morgan je podnio hiljade tužbi svakog mjeseca kako bi naplatio dugove koje su klijenti imali po kreditnim karticama. U samo jednom danu, kako pokazuju sudski registri, JP Morgan podnio je 469 tužbi.
Kako navodi tužiteljica, JP Morgan je prilikom podizanja tužbi koristio neprovjerene dokumente, što je označeno kao nezakonita praksa.
Navodi se da je JP Morgan uspostavio način naplate kartičnih dugova na način koji zloupotrebljava kalifornijske zakone, kako bi proces naplate bio što brži i jeftiniji.
Tužiteljica dodaje da je “JP Morgan odgovoran za sistematsko korišćenje nezakonitih mjera kako bi preplavio kalifornijske sudove tužbama protiv klijenata”, prenosi Seebiz.
U nekim slučajevima dužnici nisu bili ni obaviješteni da je protiv njih podignuta tužba te su za nju saznali tek kada se proces završio, a oni se suočili s naplatom duga.
