Zaposleni u Croatia Airlinesu okupljeni u sindikatu ORCA odlučili su da započnu štrajk, potvrđeno je jutros zvanično.
Štrajk počinje 8. avgusta u šest sati ujutro, prenosi portal Seebiz.
Iz sindikata podsjećaju da su poslije sastanka sa premijerom Andrejom Plenkovićem 6. jula, odložili početak štrajka, jer je premijer obećao da će se “ubrzo stvoriti potrebni uslovi, prije svega, postavljanje nove i kompetentne Uprave u punom mandatu, kako bi nakon skoro 20 mjeseci konačno potpisali kolektivni ugovor”.
“Na našu veliku žalost, premijer nije ispunio svoju stranu dogovora te smo primorani ponovno najaviti štrajk dana 8. avgusta 2018., a s početkom u 6:00 sati ujutro”, navodi se u saopštenju sindikata.
Sindikalci iz ORCA-e, dodaju da im je ovo bila krajnja opcija i da su “nakon što ni posljednji dogovor nije urodio nikakvom reakcijom predstavnika vlasnika, primorani na ovaj korak”.
